هذه قصيدة حسين بن جابر العاض بمناسبة إجراء العمليه للشاعر حمد بن جابر آل شافعه(عريج) :          
          
          
          
يا عريج سلّم لي على الربع الأدنين           
           وصّل سلامٍ لي بليّا مكاتيب
          
          
وخص الذي جيده على العسر واللين           
           وإن جا مجاله قيل من ماكر الطيب
          
          
ودّي نزاورهم ولا حن بصاحين           
           حدى المواطي صار في عرقها عيب
          
          
وبعض الأطباء قال ماحن بدارين           
           يكون الاذا العوق صابك من الشيب
          
          
وفي حكمة الله صابرين وراضين           
           وفي حكمة الله ربنا عالم الغيب
          
          
كان النشامى لك من الشّل كافين           
           فاحرص على التّطريز من طبّة الجيب
          
          
دوّر امريكي مطبه يجي زين           
           سنه ويمدي لك على الجيب والنيب
          
          
جتك النصايح يا زبون المجنين           
           جتك النصايح من كثير التجاريب
          
          
من بيننا مزح قديم وفي حين           
           وأغليك لأنك قايم بالمواجيب
          
          
لا يا بعد من ساب بين الفراقين           
           ومن بين ربعه شب قبس المشاهيب
          
          
الله يثبتنا على الحق والدين           
           ويوم البعث نفرح بحسن المطاليب
          
          
وعلى النبي صلوا وحن فيه راضين           
           واصحابه اللي رتبوا الدين ترتيب
          
          
          
          
          
          
وأتى الرد من الشاعر حمد بن جابر آل شافعه( عريج ) :           
          
          
          
          
          
يا حسين انا من بدعة القاف يا حسين           
           متخلي واللعب يدعي ولا جيب
          
          
يا حسين انا قدلي من اللعب عامين           
           وذكّر علي اللعب زين التناديب
          
          
يا حسين مكتوبك على الخشم والعين           
           أحط له في القلب منزل وترحيب
          
          
ترحيب اكثر من نبات البساتين           
           وألذ وأحلى من حليب الحنازيب
          
          
طرّشتني يا حسين صوب الدياقين           
           والكل من ربعك لمثلي معازيب
          
          
وأنا إن حييت آصل أقصاهم والادنين           
           وأقرا عليهم كلمتك بالتراتيب
          
          
أصبر علي يا زين مريوشة العين           
           لين أتعافى وآصل الخط واجيب
          
          
جعله فداك اللي على الربع له دين           
           قصده يشاني بين ربعٍ أصاحيب
          
          
نفسه خبيثه والمخاليق دارين           
           نمّام راعي شك في الأقاريب
          
          
يطلق إلسانه كل ما جا الدواوين           
           وعوايده لا قام شذب العواقيب
          
          
أنوى الشديد إلى فريقه مقيمين           
           وإن شد جنّب نيّة العفن تجنيب
          
          
يا حلو ركب الجيب واحد والفين           
           هو منوتي لا فيه شكٍ ولا ريب
          
          
هو منوة اللي ناوي صوب الأقصين           
           راعيه ما يحتاج نقل المشاريب
          
          
يالله ياعالم قلوب المصلين           
           اغفر لنا يا عالم السر والغيب
          
          
اغفر ذنوب اللي ذنوبه ملايين           
           ثقل الجبال الراسيات المهاضيب